الفور كاتس - دار القصة والرواية

في حصه الفيزياء بالمعمل جلست الشله بالصف الأخير
وفي نص الدرس قامت كل وحده طلع قصتها
وتلف كل خصله على شكل مسمار
وصارت أشكالهن تقول من زنوج أمريكا
حاولت المعلمه تمسك نفسها وبعد ماخلصت الحصه
نادتهم المعلمه وقالت/ وش معنى تصرفاتكم بالحصه
ناظرن ببعض بمنظر البراءه وسكتن
قالت/ لازم أعرف مبرر للي سويتوه
امل/ وش سوينا يا أبله هذا تسريحه شفناها بالتلفزيون وقلدناها
المعلمه/ تسريحه من إنشاءالله
منى/ أوبرا
المعلمه/ من أوبرا ؟
منى/ بنت جيرانا
المعلمه/ تو تقولين بالتلفزيون
منى/ أيه كانت أوبرا مسويه التسريحه وجالسه فوق التلفزيون
المعلمه بنفاذ صبر / خلاص ماأبي أشوفها ثاني مره
سميرة/ مانقدر نوعدك ياأبله لأن التسريحه معجبتنا وبالتالي مانقدر نغيرها
حنا مثل اللاعب يتقيد بالملعب بزي محدد لكن شعره حر بالتصرف فيه
المعلمه بعصبيه/ زين عطوني أرقام تلفونات بيوتكم
اسماء/ عطتها الرقم باستسلام
أما امل/ عطتها الرقم ببساطه لأن تلفونهم مقطوع
أما سميرة/ عطتها الرقم بس المعلمه سمعت الرقم الأخير غلط
هو كان صفر قالت سته سكتت سميرة
بس منى جتها فزعه وصحوة أدب قالت لا صفر
كان ترفسها سميرة على بطنها
وقالت/ يعجبني ذكائك المستفحل بس ليتك منطمه
ونرجس/ عطتها الرقم بس حرفت فيه شوي
أما منى عطتهم رقم جوال أمها
اللي هو جوالها بالأصح لأن ماعندهم تلفون حسب أقوالها
,
في حصه E‏ جلست كل وحده تأكل بالدرج
والمعلمه تشرح ماتشرح كله واحد
خلصت المعلمه الدرس ووقفت قدام بنت تشرح لها فقره
وفجأه تطمر اسماء على فشار منى وتأخذه
وتجي منى حاله هستيريا وتقوم سميرة تفزع معها
وصارن طردي ورى بعض بالفصل والمعلمه المسكينه تشرح للبنت
وكانت طيبه بالحيل
أمسكت سميرة الفشار وحذفته على منى بس طاح منها
على طاوله البنت اللي المعلمه تشرح لها
وتطمر منى واسماء على الطاوله وأخذوه وراحو للسبوره
كان تجي سميرة تمسك اسماء برجولها وتسحبها
وطاحت وقامت تضحك هي ومنى
فطمرت عليهم امل تفزع مع اسماء وتناشبت الشله كلن يبي الفشار
ومن كثر تسحيب الفشار انقطع الكيس وتناثر بالأرض
فانصدمن وارجعن لأماكنهن كن ميت لهن واحد
وكل الأحداث صارت والمعلمه تشرح للبنت اللي مافهمت شئ من الأزعاج
في حصه E‏ اليوم الثاني كان موضوع الدرس
كيف تحقق في جريمه كسر شباك القصر
كان غرض المعلمه أنهم يتعلمون التحقيق بالأنقلش
بس شله الفور كاتس إلاتطلع الفاعل
وقامن يطلعن المجرم مره الحارس مره الولد مره صاحب القصر
إلى حد ماطفشت المعلمه وطلعت برى الحصه وكان هذا غرضهم
وفي حصه الدين قومت المعلمه البنات يقرؤن من الكتاب
فقومت نرجس وكانت ناسيه كتابها فعطتها اسماء كتاب نحو
وسوت نفسها تقرأ منه وقامت الشله تنقلها الكلام
فصارت تكلم مثل المعوق كلمه كلمه
وفي الأخير قالت المعلمه وكانت مصرية/ عليك الله تقعودي
أنا ماعارفه كيف طلعتي من الأبتدائي داير شنو بالبنات الزمان دا
وفي حصه الكيمياء جلست المعلمه تشرح عن تفاعلات المواد
وكانت اسماء مشغوله بالأكل وحلفت ماتعطي صديقاتها
وفجأه قومتها المعلمه تسألها عن تفاعل الأسيتدات
فجلست تدور لها أحد يغششها قالت سميرة/ بطه
كان تردد مثل الببغا/ بطه
المعلمه بذهول/ وش دخل البطه
قالت امل/ ياغبيه روث الحيوانات
وعلى طول قالت/ روث الحيوانات
فعصبت المعلمه وعطتها موشح عن الكسلانات
وصديقاتها ماتن من الضحك وخلوه درس لها بسبه النذاله
وفي يوم من الأيام كانت عندهم حصه فراغ
فجتهم معلمه E‏ اللي تدرس أولى فسألت الشله بحكم أنها شله مشهوره
وقالت/ وش بتصرون إذا تخرجتوا
سميرة/ أنا عن نفسي بصير مدربه فريق وبدرب بنات حارتنا
ضحكت المعلمه وسألت باقي الشله
فردت منى/ بصير معلمه طبخ وتدبير منزلي
امل/ بصير دكتوره بيطريه
اسماء/ بصير مساعدة امل يعني نائب دكتور بيطري
نرجس/ يمكن أصير شرطيه بديرتي
ضحكت المعلمه من أحلامهن
وقالت/ طيب وش معنى أنتي يا سميرة ميولك رياضيه
سميرة/ كل شخص له ميوله وإذا كلش كلش ماصرت مدربه
بصير صحفيه رياضيه
المعلمه/ طيب بسألك سؤال وأسألك بالله تجاوبيني بصراحه
( وكانت المعلمه معروف أنها ملتزمه )
قالت اسماء بصوت واطي/ ياخوفي أنهم لاقطينك مع لاعب
سميرة / أسألي ماعندي شئ أخبيه
المعلمه/ أنتي اللي كاتبه القناص على طاوله بالمدرسه
سميرة/ ياحول عشاني أحب الكوره صرت اللي كاتبه القناص
المعلمه/ يعني موب أنتي
سميرة/ لو أنه أنا كان قلت ولاعلي بعدين لو بكتب كان كتبت الأخطبوط موب القناص
المعلمه/ من الأخطبوط ؟
سميرة/ زعيم حراس آسيا الدعيع
المعلمه/ ماتدرين أن المباراه حرام
سميرة/ الله وأكبر ومن اللي حرمها
المعلمه/ المشايخ
سميرة/ هاتي دليل
المعلمه/ النظره الأولى لك والثانيه للشيطان
سميرة / والله هذي للرجل
وكانت تدور المناقشه والفصل متابع بأهتمام وشله سميرة متشققه من الضحك
لأنهم عارفين سميرة ماتسكت عن الملاسن خصوصا إذا الأمر رياضي
المعلمه/ المباراه حرام لأن فيها رياجيل
سميرة/ ترى بيني وبينهم شاشه ولا بنقز عليهم
المعلمه/ ولو المباريات فيها رجال والمرآه مايصير تشوف عوره الرجل
سميرة/ والله اللي أعرفه ان عوره الرجل من السره إلى الركبه
وهم ساترينها ولا أنتي شايفه غير كذا
المعلمه/ أنتم ماتابعون المباراه إلا إذا كنتو تحبون لاعب
سميرة/ ليه حرام نحب لاعب بعدين أحب لاعب ولاأحب فنان
المعلمه/ طيب لو شفتي صديق أخوك راح تقولين ياحلوه قدام أخوك ولاراح تخافين
سميرة/ راح أخاف من ربي قبل كل شئ لأن لاديني ولاتربيتي تسمح لي بهالشئ
المعلمه/ شوفي يا سميرة ياأني أقنعك ياأنك تقنعيني
سميرة/ أجل بتطولين لأني ماأقتنع بأفكار مالها معنى
المعلمه/ ليش مالها معنى أنتي لازم يكون لك قدوه أهلك يشوفونك تابعين مباريات
سميرة/ أيه أمي نتحدى أنا وياها على المباراه ولو شايفه فيها حرام ولاعيب أمنعتني
المعلمه/ أهلك موب قدوتي
سميرة/ ولا أنتي قدوتي
هنا ماتن شلتها من الضحك
سميرة/ شوفي ياأبله أنتي ماعندك دليل للتحريم ولافيه دليل
ولا في المباراه غلط ولو فيها كان أنا تركتها بنفسي
المعلمه/ بس أنتم همكم الزين
سميرة/ مافيه بنت ماتحب الزين ولازم تقول هذا زين وهذا شين وهذي فطره في المراءه
تحب الزين بعدين عندك المسلسلات وش حكمها بنظرك
المعلمه/ حرام لأن فيها خلوه
سميرة/ أشوى أنك عارف السبب لأني ماشفت حريم يلعبون مع اللاعبين
المعلمه/ هالحين البنت ماتابع المباراه للأستمتاع
لا تناظر في لاعبها المفضل حتى تجمع عنه كل المعلومات
سميرة/ مو كل البنات سوا بعدين حتى أنتم تجمعون معلومات عن المشايخ
المعلمه/ ذولي مطاوعه
سميرة/ ياسلام وش الفرق المطوع يخاف ربه ويحدث على الناس
واللاعب يخاف ربه ويلعب كوره
وكثير من اللاعبين مطاوعه وماظنتي يمنعون أهله مايشجعونهم
ودق الجرس قالت المعلمه/ لنا لقى ثاني إنشاالله
سميرة/ حاضرين في أي وقت مع أني :
‏ ‏I'm alawys the
winner
( دائما الفائزه )
وطلعت وقام الفصل يصايح ويصفق سميرة تعيش سميرة تعيش تعيش تعيش
قالت/ لاداعي لاداعي أنا في خدمه الشعب
كانت كذا حياتهم أحداث مضحكه ولعب ووناسه وحياه عاشوها ببراءه
ومافكروا أنه بيجي يوم نرجس تروح لديرتها وبيفقدون أجتماع شلتهم


يتــبع